Si Palui "Duit Panas"

 Si Palui "Duit Panas"

KAKAWALAN Palui samunyaan tumbur, karna samingguan ini tadangar habar bahwa Palui sudah manggawi nang kada baik alias manggawi nang kada halal. Ada jua nang manyambat Palui mandapat duit panas. Bubuhan kakawalannya itu magin curiiga karna wayah ini Palui pina panduitan banar. Nang biasanya cuma kawa manukar ruku babilahan, wayah ini bilang tating-tating wan ruku sakutakan.

Itu Paluinya ampah ka sini, cuba takuni dimana inya mandapat dut panas itu, ujar Tulamak. Lui, aku ampun maaf samalam kada hakun ikam bawai makanan di warung acil Isul, kama duit ikam adalah duit panas, ujar Garbus manakuni Palui. Hasuuuu... Siapa nang mamadahakan kaya itu? Ujar Palui takajut-kajut. Habar ini sudah samingguan kami dangar matan urangurang. Mudahan kada bujur alias sas-sus haja, ujar Garbus pulang.

Oooo.. itu kah? Bujur haja Bus ai, samunyaan duitku adalah duit panas. Tapi biarpun duit panas samunyaan duitku pasti halal, sahut Palui, Kalu ikam tahu dut ikam itu adalah duit panas baiknya disadakahakan haja, kada baik dimakan, badosa, ujar Tulamak. Duitku itu duit panas karna hasil itik paluh saurang, ujar Palui Duit panas itu pasti hasil kada kada jujur, pungli, panyalewengan, manipu, ujar Garbus. Bubuhan ikam jangan sambarang tuduh jaku manipu atawa pungli, kama samunyaan itu hasil gawianku, ujar Palui.

Gawian napa Lui? Ujar Tulamak. Wayahini gawianku maambil upah manggusuk baju salawar, maka itu duitnya panas. Apalagi rancak duit nang dibayarakan itu lusuh, unyak, supaya baik dan licin maka duitnya kugusuk, ujar Pali lihum manjalasakan gawiannya. 000 .. itukah nang dipadahakan duit panas Lui? ujar Garbus paham lalu mambawai Palui ka warung acil Isul minta ditaraktir minum.

Tweet