Si Palui "Kada Bakapala"

Si Palui "Kada Bakapala"

Kada makan di warung katupat Kandangan haja ada istilah kada bakapala, karana kapala haruannya habis. Tapi ada jua istilah kada bakapala dalam mamanjatakan doa ulih sasaurang kapada Allah.”Napa Lui takarinyum saurangan ikam?” takun Garbus.

“Ada mandangar tuan guru babacaan, ujar sidin doa sasaurang nitu bila kada dimulai salawat wan kada diakhiri salawat kaya urang kada bakapala wan kada babatis,” sambat Palui.

“Iyakah Lui, kaya apa maksudnyalah?” sahut Tulamak.“Makanya parlu jua kita ne badadangar bila tuan guru babacaan ujar urang wayah ini tausiah, sakali saminggu, apalagi dua atau talu kali ya, bagus lagi nitu,” sahut Palui lain nang dijawabnya.

“Maksud Tulamak, apa masalahnya jadi kada bakapala?” Garbus manyela.“Uh bujur Bus lah, doa kita nitu kada kawa taangkat ka atas langit bila kada diawali salawat wan kada diakhiri salawat, maksudnya kada bakapala wan kada babatis, jadi maawang-awang di udara, kada kawa naik ka atas langit sampai tujuh lapis langit. Sama ai perbandingannya kaya urang kada bakapala wan kada babatis, kawalah bajalan,” Palui bahimat manjalasakan.

“Makanya parlu balajar ka guru, kalau handak baamalan kaya urang alim iyakah Lui?” sahut Tulamak.“Baamalan pina musti, tapi kada takabul, karana kada tahu adab-adabnya dalam badoa nitu,” sindir Palui ka buhannya.

“Jadi Lui lah, pantas haja tuan guru wayah ne banyak nang baduit, karana amalan sidin kabul, diijabah Tuhan, doa tuan guru,” sambat  Garbus.“Datangi tuan guru ka rumah, minta amalan supaya lakas sugih, jangan datang ka dukun kena manyalahi akidah tauhid, makalahan am dosa ganal. Maandak sasajinkah ka bawah puhun rumbia, atau parcaya lawan karis nang baapuah,”  Palui manasihati.

“Tampulu batis kawa bajalan, awak sihat,rajin-rajin manuntut ilmu agama, supaya amalan kita ne ada payung hukumnya, ujar istilah buhan eksekutif jua pang, kawa jadinya dipertanggungjawabkan , apabila kita sudah masuk kubur kena,”  Tulamak sakalinya bisa manambahi.

“Intinya rajin manuntut ilmu, sampatakan waktu disela kasibukan bisnis kita sahari-hari,”  Palui katuju banar banasihat.“Ayuha nah, isuk kamarian Ahad aku handak mandangar tausiah guru di masjid Quba, ada jua kena sangu gasan mati,” ucap  Garbus.

“Katuju banar aku Bus ai nah, kalu ikam rajin mandangar guru tausiah di masjid, karana ada urang nang alergi ka masjid, malihat masjid pina takutan, salat di rumah haja, kada mau ka masjid, padahal masjid parak wan rumahnya, kada mangarti aku,”  Palui tauling kapala.“Makanya parlu mulai kakanakan, dibiasakan suka salat bajamaah, kena sudah tuhanya, urang nitu cinta wan masjid bila handak salat, iya kada Lui,” sindir  Tulamak.

“Iya banar Mak ai?”  Palui mulai takarinyum.Han rami kalu bila takumpulan  Palui sapakawalan, saling nasihat,mangajak kabaikan.

Tweet