Si Palui "Manggutak Tasbih"

 Si Palui "Manggutak Tasbih"

PALUI hiran malihat abah Garbus biar sudah tuha tapi masih talihat gagah, kada pina uyuh. Lalu ai inya nang handak tahu napa rahasia abah garbus bisa awit anum."Bus... ui... Garbus. Aku ada nang handak ditakuni nah," ujar Palui pina supan-supan. "Napa garang nang handak ditakunakan," ujar Garbus.

"Aku handak batakun ini haja. Rahasia abah ikam kanapa bisa awit anum. Padahal, sidin sudah tuha banar kalo?" ujar Palui.

"Ooo itukah. Mun kaya itu kada usah ngalih-ngalih. Baca haja dibuku-buku majalah banyak rasip-rasip awit anum. Macam-macam rasipnya ada nang maamalakan banyak nginum banyu putih, nginum jamu awit anum sampai rancak-rancak manggutak," ujar Garbus memadahkan.

"Apa maksudnya rasip nang tarakhir ikam padahakan itu Bus?, ujar Palui kisah kada paham."Bah ikam ni kisah kada paham haja. Tahu ai kalau manggutak," ujar Garbus. Palui lihum langsung bagagasakan bulik mandangar rasip tarakhir nang dikisahkan Garbus.

"Bus, kanapalah aku lihati Palui sabulan ini pina pucat, pina uyuh, kada basumangat. Kalihatan pina tuha banar. Nang aku magin hiran bininya kaya itu jua," ujar Tulamak mangisahakan kaadaan kawalnya itu."Aku hiran jua Mak ai," ujar Garbus. "Sabaiknya kita ilangi haja, siapa tahu inya dua laki bini garing," ujar Garbus.

"Ada apa bubuhan ikam ka rumahku," ujar Palui Batakun."Kami ni hiran haja. Sabulan ini ikam jarang bakumpul. Biasanya, ikam ada haja talihat," ujar Garbus."Ikam Garingkah Lui? Ku itihi hari-hari muha ikam itu pina pucat wan pina kauyuhan, kada kaya dahulu lagi, ujar Tulamak menambahi.

Kada apa-apa, aku cuma kauyuhan bagawi di pahumaan haja," ujar Palui kasupanan. "Napa jua nang ikam gawi di pahumaan Lui? Musim katam masih lawas lagi," ujar Tulamak pulang.

"Ooo hanyar aku ingat. Kira-kira, ikam ini menjalankan rasip tarakhir nang aku padahkan itu. Wayah itu aku mamadahakan supaya rancak-rancak manggutak," ujar Garbus manabak.

"Hi-ih Bus ai. Ikam memadahkan ngitu lo," ujar Palui supan.

Mangalakak Garbus imbah mandangar pangakuan Palui. "Palui Ikam ni dasar utak masum. Jadi salawas ini ikam salah manafsirakan. Kada nang ngitu pang maksudku. Abahku itu sidin rajin ka masigit. Imbah sambahyang sidin batinggal di masigit, sidin ba zikir alias manggutak tasbih. itu maksudku, Kada manggutak nang sabuting itu pang. Kasihan bini ikam nang jadi korban," ujar Garbus manumpalak.

Habang hirang muha Palui imbah mandangar maksud Garbus. "Ooo Nang kaya itu kah maksudnya. Baarti nang kugawi ini kadanya maulah awit anum tapi malakasi ka luang kubur karna kararancakan, ujar Palui belelucu mahilangakan supan.

Tweet