Si Palui "Tasalah Puruk"

Bini Palui baranak pulang. Jadi ganap anam ikung Palui baisian anak. Sakira bininya kada batianan pulang, Palui wan bininya tulak ka puskesmas manamui ibu bidan.

“Kalo kaya itu Pa Palui laki bini ulun saranakan baumpat haja program KB alias kaluarga barancana. Tinggal mamilih handak mamakai cara nang mana. Nang ini gasan babiniannya, diminum satiap hari, kalo nang ini disuntikakan sabulan atau talu bulan sakali,” ujar bidannya  sambil manunjukakan ka ubat KB wan obat suntikan.

“Nah kalo nang ini gasan sampiyan Pa Palui ai, ngarannya gatah kondom,” ujar bidan manunjukakan.

“Ulun kada hakun basuntik abahnya ai, ulun takutan malihat jarum. Amun baminum obat ulun kada hakun jua,” ujar bininya sambil bakirik. “Sabaiknya pian haja nang baumpat ba-KB abahnya ai,” ujarnya pulang.

“Nangkaya ini haja nah Bu bidan, sabaiknya ulun haja nang ba-KB. Biar haja ulun nang mamakai gatah galombongan itu,” ujar Palui.

“Ayu ja kalo kaya itu. Sampiyan ulun bari sakutak kada usah babayaran, kaina kalo habis pian kawa manabus ka sini. Sampiyan sudah tahu kalo nangkaya apa manggunakannya?” ujar bidannya batakun.

“Balum, baluman tahu lagi,” ujar Palui bapadah.

“Caranya gampang haja. Kondom nang ini harus pian pakai sabalum pian badua guringan. Caranya buka dahulu bungkusnya... lalu andak nangkaya ini, imbah itu hanyar ditarik,” ujar bidan manarangakan mamakai ibu jarinya lalu diandaki kondom di ujungnya hanyar dipuruk.

“Ulun paham, ulun paham. Kalo nangkaya itu tarimakasih banyak ibu bidan lah,” ujar Palui parmisi lalu mambawai bininya bulik.

Imbah talu bulan sakalinya bininya mangidam pulang, inya muak-muak. Sawat bingung jua Palui kanapa maka batianan, padahal sudah ba-KB. Sabarataan nang dipadahakan ulih bidan sudah jua inya wan bininya gawi.

“Nangkaya apa ngini bu bidan? Kanapa maka bini ulun batianan pulang. Padahal sudah ulun gawi sabarataan nang pian padahakan, pokoknya ulun kacewa wan sampiyan,” ujar Palui manyanyarik wayah manamui bidannya.

“Sabar...sabar Pa Palui, coba pian kisahakan dahulu bujur-bujur. Mungkin kaina katahuan salahnya dimana,” ujar bidan manyabarakan Palui.

“Satiap handak guringan ulun buka bungkus gatahgalombongannya, ulun puruk sasuai wan patunjuk sampiyan dahulu. Lalu nangkaya

biasa jua kami badua batampur,” ujar Palui bakisah.

“Lalu nangkaya apa rasanya?” ujar bidan manakuni.

“Kada barasa napa-napa. Rasanya nangkaya biasa haja, nyaman banar nangkaya kada ba-KB-an. Cuman ibu jari ulun haja rasa kada nyaman

karna tabungkus wan gatah tarus wan mahatiakan kalo pina tapacul,” ujar Palui.

“Nah, di situlah sakalinya salahnya,” ujar bidan

bakakajutan. “Sampiyan salawas ini tasalah puruk. Kalo nangkaya itu salamat. Pa

Palui cagar baisian anak pulang,” ujar bidan manyalami tangan Palui. 

Tweet