Si Palui Satangah Litar

Si Palui Satangah Litar

MAMANFAATAKAN halaman rumah di pinggir jalan di kuta dudul, jadi pang umpatan jua si Palui bajualan bensin. Tampulu kawa dua atau talu kali bulik malangsir kadada jua aparat nang managur, mamudifikasi tangki sapida mutur RXnya nang jadul kada rahasia umum lagi.

”Umpatan ha aku bajualan bensin wan pertalitenya,” ujar Palui nang diakuri haja ulih bininya. Ikam umanyalah nang bajualan aku nang pargi malangsir ka pom bensin, jangan kalah wan urang lain jua,” ujar Palui pina musti banar ka bini. “Barapa salitar bensinnya?” takun nang bini.

“Kalau bensin ditukar sakitar 7000-an, dijual 9.000, karana cacariannya ngalih banar, lawas sajam labih baantri,” ucap Palui. “Kalau per talitenya barapa ya salitarnya?” takun lagi nang bini.

“Sama haja wan bensin karana sudah larang tadahulu, biar ai pertalite sadikit haja bahujung, karana bila handak pertalite nitu kada usah baantrian di SPBU,” Palui mamadahi ka bini harga-harganya.

Palui ne tamasuk urang nang saling cangkal dalam bausaha. Matan baisukan sampai malam , tatap buka. Urang manukar bisa mamanfaatakan situasi , dilihat kadada Palui di rumah ada nang maisi bensin. Sudah ditakarakan wan dituang ka tangki sapida mutur sakalinya Garbus bapadah bahutang.

”Barapa haraga salitar bensin bini Palui?” takun Garbus. “Haraganya 9.000,” jawab bini Palui. “Aku bahutanglah satangah litar, kawa bayar 4.500 haja, ne gin duit pacah nah,” ujar Garbus.

“Kaya nitukah Bus, pabila bayarnya?” sahut bini Palui. “Bayarnya kena bila aku manukar bensin lagi ka sini?” jawab Garbus lakas manyatatar sapida muturnya.

Kamariannya pas Palui nang jaga, ada datang Tulamak manukar bensin ka Palui. ”Lui aku mambawa duit kada cukup, bahutang dahululah satangah litar,” ucap Tulamak.

“Umai Mak, salitar haja kada hingkat manukar, apalagi dua atau talu litar,” sahut Palui asa kecewa. “Napa Lui ai, usaha kada tapi rami lagi, jadi pang pandapatanku kada cukup gasan dimakan sahari,” Tulamak marista.

Karana babarapa kali kajadian urang manukar satangah litar haja, maka Palui mancari litar nang satangah jua. Pakacil Matsun datang manukar bensin sungsung baisukan. ”Lui aku manukar satangah litar haja,” ujar sidin. “Nah pas pakacil ai, aku ada sudah baisian litar nang satangah,” sahut Palui lihum.

“Bah iya pang kada jadi am aku bahutang, rencana dalam hati, Palui tuang salitaran, satangah liar haja aku bayari, satangah litarnya aku bahutang,” ujar sidin nang handak tulak ka Rantau kada jadi karana takutan kalu kada cukup satangah liar haja nitu.

“Maaf pakacil ai, aku kada kawa mahutangi , badua sudah nang bahutang satangah litar, kada kawa bayar lagi,” Palui manyambat.Pakacil Matsun bagaru kapala sidin. Pasalnya Palui pintar wayah ne, ada baisian litar nang satangah.

Tweet