Si Palui "Buntat Kada Kalihatan"

 Si Palui "Buntat Kada Kalihatan"

Wayah Palui kana PHK pabrik kayu, maka inya mancuba bausaha bajual ubat di kaki lima. Maampar lapik plastik lalu manyusun parlangkapannya. ada ular nang sudah karing, ada karungkung siput, karungkung kalimbuai, rantai jukung, kayu pasak bumi wan kayu akar bahar. Lalu inya kukuriak mangiyaui urang di kiri-kanannya sambil baigal-igal banyanyi lagu dangdut. 

"Ayu dangsanak sabarataan, siapa handak malihat, saksikanlah anih tapi nyata, nang mati bisa hidup, nang hidup bisa manangsa," ujar Palui kukuriak."Ulun kada bajual ubat tapi mambari ka saktian, mambari ilmu, siapa kada mendangar pasti rugi dan manyasal. Maaflah dangsanak nang kada mandangar alias tutulian, bila kada mandangar rugi, maka lakasilah baubat supaya kada makin bangak," ujar Palui.

"Ucapan ikam itu Lui ai bisa manyinggung urang nang tuli," ujar Garbus mambisiki."Jangan hawatir urang tuli pasti kada mandagar makanya kuanjurakan baubat," ujar Palui."Apakah ikam ada bajualan ubat tuli?" ujar Garbus. "Aku kadada bajualan ubat tuli, nang kujual ini adalah ubat ketaguhan," ujar Palui."Jadi anih jua Lui ai kalu ikam manyuruh urang baubat tapi ikam kadada buajualan ubatnya," ujar Garbus.

"Aku manyuruh urang baubat itu ka puskesmas atawa ka rumah sakit," sahut Palui mulai mahaluya. "Jadi ubat kataguhan napa nang ikam jual ini Lui?" ujar Tulamak handak tahu."Nang kujual ini adalah buntat kalimbuai pusing kiwa. Buntat ini ngalih dicari dan ha nya ditamui sabuting diantara saribu kalimbuai," ujar Palui.

"Bila mamakai buntat kalimbuai ini taguh kada tadas di-igut tabuan atawa iruan dan tahan kada sakit disangat wanyi. Ada lagi nang labih hibat bahwa bila buntat kalimbuai ini disimpan dalam kantung atawa dalam kupiah pasti kada cagar kalihatan," ujar Palui lihum mayakinakan urang nang mandangarakan panderannya.

"Wah, wahhh... harat banar kawa bahilang kada kalihatan," ujar Tulamak tataguk panderan Palui si panjual ubat itu. "Aku umpat manukar sabigi," ujar Tulamak."Mak, baingat Mak. Ikam jangan tapangaruh wan panderan Palui," ujar Garbus. Kanapa maka harus baingat-ingat Bus?" ujar Tulamak.

"Cuba dangarakan bujur-bujur bahwa bila buntat itu dibuat ka kantung atawa ka kupiah pasti kada cagar kalihatan. Nang kada kalihatan itu adalah buntat kalimbuainya karna talindung kantung dan talindung kupiah ikam. Jadi kadadanya ikam nang kada kalihatan atawa bahilang tapi si buntat itulah nang hilang dari pandangan mata," ujar Garbus panjang lebar manarangakan.

"Ngalih jua mangaramputi papadaan," ujar Palui pina sadih karna taungkai karamputnya.

Tweet