Si Palui "Kada Pamakan Daging"

Si Palui "Kada Pamakan Daging"

Palui wan kakawalannya disaru ulih pambakal tuha basalamatan di rumah sidin. Rupanya sidin handak tulak haji, makanya handak sakampungan di undangi sidin malam Jumahat kaina, imbah sambahyang Isya."Ayu Lui, kita tulakan ka rumah sidin pasti makannya nyaman karna sidin urang sugih," ujar Tulamak mambawai.
"Sabujurnya aku katuju banar mandatangi urang aruh Mak ai, tapi hatiku rasa barat ka rumah pambakal tuha ini karna sidin panyarikan banar," uja Palui pina sadih."Ikam jangan takutan, sidin kada cagar sarik asal haja bubuhan kita jangan nakal, jangan cariwit dan jangan macam-macam," ujar Garbus.
Malam Jumahat itu imbah sambahyang Isya matan langgar bubuhannya langsung ka rumah pambakal tuha, nang biasa jua dikiyau pambakal Ijuh. Imbah tuntung mambaca yasin wan doa salamat, lalu kaluar makanannya."Cucuk liur, iwak daging masak habang. Lawas kada makan daging, ada acamya," ujar Tulamak bahihiut pina kanyamanan.
"Ikam sabangsa baliur kucing, iwak napa haja cucuk tapi aku kada tabiasa makan daging Mak ai," ujar Palui."Kalu ikam kada bisa makan daging kaina kumintakan gagantiannya wan pambakal tuha, mungkin ada cadangan iwak hayam atawa hintalu," ujar Garbus. Lalu Garbus baucap.
"Uiii urang di dalam, adalah iwak lainnya karna kawal kita ini kada pamakan iwak daging?" ujar Garbus mamintakan Palui.Kada lawas imbah itu, kaluar pambakal tuha. "Siapa tadi nang kada pamakan daging, ayu masuk ka dalam," ujar pambakal tuha. 
"Ulun pambakal ai ulun kada pamakan daging," ujar Palui baangkat tangan."Silahkan nang lain makanan, Palui lakasi masuk ka dalam," ujar pambakal tuha mangiyau Palui."Cagar makan ganal iwak hayam, iwak hintalu kawal kita Palui dikiyau ka dalam," ujar Garbus.Lalu bubuhannya makanan gancang banar karna iwak nyaman dan hirisannya ganal-gatal. Kada lawas imbah tuntungan makanan, Palui kaluar matan kamar dalam, sambil takuringis dan matanya pina habang.
"Kawal kada babawaan makan nyaman saurangan," ujar Tulamak."Razakinya ikam dibawai makanan di kamar wan disayangi pambakal tuha," ujar Garbus manyindir."Alhamdulillah. Padas, panas banar, panas manyalingit dan parut makin galurukan," ujar Palui sadih sambil takuringis."Hau, kanapa maka padas, panas manyalingit?" ujar Garbus.
"Ini nah lihati talingaku habang bakas dipulas sidin babarapa kali gancang banar, sidin sarik karna tadi aku kada pamakan iwak daging. Lalu sidin baucap: jangan macam- macam nang diminta, jangan minta iwak hayam atawa hintalu. Iwak daging ini gin aku bahutang," kisah Palui manuruti panderan pangbakal tuha. Palui pina marista, karna talinga habang bakas dipulas, maka kada sawat makan.

Tweet