Si Palui "Sadih Ingat Naik Haji"

 Si Palui "Sadih Ingat Naik Haji"

Samalam Palui umpat maantar mamarinanya ka Banjar. Mamarinanya itu handak umpat manasik haji nang diadaakan di masigit raya, karna sidin tahun ini ada langkah manunaiakan rukun Islam nang ka lima itu. Imbah bulik maantar mamarinanya itu, Palui pina ubah banar, rancak banar sadih pina taungut.

"Kulihat ikam pina banyak taungut, babida banar wan hari-hari sabalumnya," ujar Garbus. "Kalu ada nang jadi pikiran baiknya diungkai haja Lui ai, kalu kawa kubantu. Karena kita ini sudah kaya badangsanak haja. Apa ikam bakalahi pulang wan bini ikam," ujar Garbus.

"Tarus tarang haja Bus ai, biniku makin sayang wan aku, talambat sadikit haja bulik dicari-inya," ujar Palui. "Itu artinya bini ikam kada sayang Lui ai, tapi inya curiga wan ikam," ujar Garbus.

"Aku wayah ini kada kaya dahulu lagi, awak sudah tuha makanya banyak batobat haja Bus ai," sahut Palui."Lalu napa nang ikam sadihakan?" ujar Garbus.

"Samalam aku Bus ai, ma-antar mamarinaku umpat manasik haji di masigit,"sahut Palui."Tapi kanapa maka ikam sadih imbah ma-antar mamarina ikam itu padahal ikam gin sudah haji jua," ujar Garbus mahibur Palui.

"Karna aku sudah haji itulah maka aku sadih," ujar Palui."Mustinya ikam malah bagambira karna mamarina ikam kawa tulak haji," ujar Garbus.

"Satiap tahun bila manulakakan kaluarga naik haja pasti hatiku sadih. Cuba ikam takunakan wan siapa haja nang sudah biasa ma-alaminya pasti sadih kaingatan dan kaganangan parjalanan bahaji itu," ujar Palui."Jadi karna kaingatan itulah maka ikam baminggu-mingga sadih," ujar Garbus.

"Hi-ih," ujar Palui singkat sambil manangis taisak-isak. "Hau, kanapa maka managis Lui?" ujar Garbus."Aku bujur-bujur sadih banar Bus ai. Pabila juakah ampihnya," ujar Palui Sadih ikam itu pasti ampih Lui ai bila kaina mamarina ikam itu tulak, wan kaina kita hadangi datangnya," ujar Garbus."Kukira dalam ampat lima tahun sadihku ini kada ampih jua," ujar Palui.

"Kanapa maka ikam baucap kaya itu Lui, mustinya ikam bagambira dan basyukur karna batambah pulang kaluarga ikam nang bagalar al-haj," ujar Garbus. Aku kaingatan Bus ai,"ujar Palui."Kaingatan napa?" ujar Palui. "Aku kaingatan, sudah lima tahun naik haji...," ujar Palui manggaraung manangis. Sabar Lui, sabar Lui, baistigfarlah. Sadih napa maka manangis," ujar Garbus.

"Aku kaingatan.... aku kaingatan bahwa hutangku gasan ONH dahulu sampai wayah ini balum jua punah," ujar Palui makin manggaraung manangis. 

Tweet