Si Palui "Talinga Rinjing"

 Si Palui "Talinga Rinjing"

Di parak rumah Palui ada urang hanyar manyiwa rumah, pinanya urang subarang sana alias matan solo atawa jogja karna panderannya halus banar. Halus tatacaranya, hurmat wan ramah tamah banar tingkah lakunya

Wayah kamarian samalam bini tatangga hanyarnya itu datang ka rumah Palui, di samping handak bapapatuhan juga handak mainjam wadah manyanga iwak, sambil baucap: "kalau boleh bisa nggak kami pinjam wajan ibu?" ujar tatangganya itu ka bini Palui.

Lalu karna kada tapi paham bahasanya apalagi diucapakan gamat banar maka bini Palui langsung manyahut bahwa inya kadada ba-isian tupi waja. Tapi walaupun inya kada paham dijulunginya jua tupi helm karna dikiranya handak mainjam tupi helm sebagai pangganti tupi waja itu.

Karna bini Palui pina rami banar bapapanderan di dapur wan tatangga hanyarnya itu lalu Palui mandatangi, handak katakuni napa maksudnya.

"Maaf beribu-ribu maaf, karna mengganggu sampiyan berdua. Maksud kedatangan saya ini adalah selain buat bersilaturahmi juga kalau boleh saya pengin pinjam wajan, karna besok kami ada sedikit hajatan yaitu selamatan pindah rumah," ujar tatangga hanyarnya itu.

Palui paham maksudnya lalu kuambilakan wajan alias rinjing nang bagantung di parak kompor, langsung dijulungnya.

"Terima kasih.. matur suwun, Kalau boleh tahu, kalau orang sini menyebut wajan itu apa ya?" ujarnya pulang.

"Kalau kami menyambatnya wajan ini rinjing," ujar Palui manjalasakan.

"Oooo......," ujarnya paham. "Kemarin waktu kami sekeluarga baru pindah, ada juga orang yang bilang rumah yang kami sewa itu dekat dengan rumah si Palui talinga rinjingan," ujarnya.

"Hee..!?" ujar Palui takajut. "Siapa nang n aku nangkaya itu, siapa urangnya?" ujar Paluih

"Orangnya kurus dan kepalanya botak dan satunya lagi gemuk rambutnya keriting," ujar tatangganya itu. "Memangnya telinga rinjingan itu artinya apa pak Palui?" ujar tatangganya handak tahu istilah urang banjar.

"Ooooh, talinga rinjing itu artinya bagus banar. Artinya talingaku ini kawa mandangar matan jarak jauh," ujar Palui tapaksa mangaramputakan

Kada lawas tatangga hanyarnya itu parmisi bulik ka rumah sambil mambawa rinjing.

Nah...... abahnya, sakalinya ada haja urang nang kawa mangalahakan sampiyan, mamadahakan Palui talinga rinjingan, ujar bininya manawaakan.

"Tahu ai aku siapa nang manyambati itu," ujar Palui habang muhanya manahan sarik. 

Tweet