Si Palui "Garing Kada Batungkih"

Nangkaya biasanya mbah  sumbahyangan isya bubuhannya bakumpulan di pus jaga. Ujar  urang wayah ini marumpi atawa bahadu wisa pandiran. Pas kabalujuran di pus jaga nang itu rami bubuhan kampung takumpulan ada nang bacatur ada nang baremi ada jua nang main domino, cuma Palui nang kadada umpat hadir.

“Aku bingung jua Rang ai, saban hari aku malihat barita di tipi atawa di koran. Di kuta-kuta ganal nangkaya Jakarta, banyak kajadian kriminal,” ujar Tulamak mambuka pander.

“Sababnya napa, salah satunya itu pang karena ngalih bacarian gawian ujung-ujungnya marampuk, mancuntan wan jua katuju bajajumput git urang.Kada tahu lagi wan kaluarga dangsanak pukuknya sikat tarus biar sampai batungkih wani babunuhan wan dangsanak, ukurannya nyawa tupang nang malayang,” ujar Tuhirang.

“Hi-ih, aku gaer jua mandangar barita di tipi atawa di koran nangkaya itu pang banyak kajadiannya banyak nang batungkihan sampai bamatian handak saban hari aku mandangar baritanya yang itu pang gara-gara kadada sing gawian, jadi kada tapi waras lagi pamikiran,” ujar Garbus umpat bapander. 

“Alhamdulillah di kampung kita ini kadasa parnah tadangar urang bacakut, bahual papadaan, apalagi sampai batutungkihan,” Garbus baurut dada.

“Lalu napa hubungan garingnya Palui wan kajadian di tipi wan koran nitu Rang?” ujar Tulamak wan Garbus kada paham.

“Aku ada batamu wan bininya Palui. Ujarnya lakinya itu sahari kada batungkih manggaring tupang awaknya, baarti sahari amun kada mambunuh urang langsung garing tupang si Palui. Bisa habis urang sakampungan ditungkihi si Palui,” ujar Tuhirang pina nahap.

Hinip bubuhannya badua mamikirakan kisah si Tuhirang nitu, asa kada parcaya bubuhannya wan kalakuan Palui, napa sudah bapuluh tahun bakawal sarantang saruntung, bahkan sudah nangkaya dingsanak saurang. Jadi kada mungkin Palui baulah nangkaya di kesah Tuhirang nitu.

“O…oo…ujar Tulamak hanyar tapikir. Nang itukah? Nang itu bukannya batungkih mambunuh urang pang, tapi maksudnya awaknya gagaringan mun sahari kada bagawi manungkih atawa mabalah kayu gasan dijual, sabab Palui sudah tabiasa bagawi manungkih kayu.

Saban hari mun kada bagawi inya kada kawa manukar baras wan iwak. Amun palui kada manukar baras wan iwak, maka bisa garing kalaparan sarumahan.

“Uuuu … tasalah kah? ujar Tuhirang supan saurangan. dikiranya Palui garing amun sahari kada manungkih urang.

Tweet