Si Palui "Mahar Ada Maknanya"

Hujan bilang kada sing ampihan. Sudah talu hari ini harinya pina murung tarus. Paling panasnya satumat haja, imbah itu kadap pulang harinya.Maka wan angin daras, maulah hawanya magin dingin haja. “Magin tahun makin batuha awak, “ ujar Garbus.“Buruk taduduki, “ sahut Tulamak lihum. “Kalu ikam makin bauntung Mak ai, makin batuha justru makin balamak awak, “ ujar Garbus.

“Makin lamak justru makin kadinginan Bus ai karna kadada salimputnya, “ ujar Tulamak. “Maka itulah lakas-lakas manukar salimputnya, “ ujar Garbus.“Haraga salimput wayahini larang banar, apalagi bila handak salimput nang putih kuning lamak mungkal, “ ujar Tulamak paham.“Sabujurnya harga salimput itu kada larang jua asal bisa mamaraki, mamandiri dan marayu nang ampun salimput, ujar Palui umpat manyahuti.

“Ngalih jua Lui ai karna tagantung abah umanya, apalagi bila abah umanya itu mata duitan, wayahini larang banar jujurannya. Makanya tadi Tulamak baucap buruk taduduki, “ ujar Garbus. “Nang panting intu kada jujurannya tapi adalah maharnya tanda jadi, “ ujar Palui.“Bujur haja mahar akad nikahnya kada sabarapa tapi hantaran wan gasan basalamatannya nang jut-jutaan, marijut, “ ujar Tulamak handak manyambat juta-an.

“Buktinya aku wan biniku si Zaleha itu, manyambat maharnya haja dan salamatannya dijamin mintuha, “ ujar Palui tatawa.“Untung ikam Lui ai bamintuha sugih, baik hati dan dermawan. Kada samunyaan urang kaya itu Lui ai, “ ujar Garbus mamuji“Napa maharnya Lui?” ujar Tulamak. “Maharnya saparangkat alat shalat haja, “ sahut Palui. “Hakun hajalah pihak bibinian manarimannya, “ ujar Garbus.

“Alhamdulillah ditarima haja tapi ada syaratnya. Syaratnya itu aku kada bulih balangkambingan sembahyangnya. Kuanggap ini baik banar karna mandidik aku supaya aku jangan jadi buntat. Tanyata memilih atawa mambari mahar jangan sembarangan. Kalu nang wajar adalah duit, umpamanya dengan mahar lima ribu rupiah atau dengan amas sebingkai utas, “ ujar Palui.

“Bulihlah Lui mambari mahar itu sebigi kitab suci Alquran, “ ujar Tulamak. “Makanya tadi kusambat hati-hatilah mambari mahar.Kalu maharnya sebigi Alquran baarti ikam harus bisa mangaji dan mambimbing bini ikam mangaji. Kaya aku mambari mahar saparangkat alat shalat makanya aku kada bulih balang kambingan sambahyangnya dan harus mambimbing bini sambahyang bajamaah, “ ujar Palui.

“Aku himung banar wan ikam Lui ai, imbah kawin ini ikam makin alim, makin santri. Mudahan salawasan kada tabulik jadi buntat, “ ujar Garbus mamuji tapi sambil manyindir.

Tweet