Si Palui "Putih Lamak"
Lawas Palui maninggalakan banua badiam di kuta. Rasanya lawas banar, ada pang ampat tahun Palui kada sing bulikan ka banua. Bubuhan kakawalannya nangkaya Garbus, Tulamak wan Tuhirang sudah dandaman banar. Samalam tahabar Palui wan anak bininya bulikan ka banua, babulik pulang ka gawian lawas yaitu bahuma wan bakabun. Garbus nang mandangar Palui bulik langsung bailang ka rumah Palui.
"Itu Paluinya, lagi baurut di kamar," ujar nang bini."Siapa tukang urutnya?" ujar Garbus."Biasanya.... kawal lawasnya jua yaitu julak Tuhirang. Ayu ja lakasi masuk, Palui sudah babarapa kali manakunakan sampiyan," ujar bini Palui."Uuuiii..... Lui!" ujar Garbus manapuk balukuk Palui nang lagi diurut Tuhirang.
"Kanapa bulik ka banua kada bahahabaran, karna jaka kami tahu pasti kami sambut wan hadrah," ujar Garbus."Kami sakaluargaan bulik ka banua ini karna takana PHK jadi tapaksa ai mambuliki gawian bahuma wan bakabun," ujar Palui.
"Tapi biarpun kana PHK, sawat jua tarasani nyamannya karna kami lihat awak ikam balamak wan baputih, mampunut kaya awaknya Tulamak artinya ikam hidup makmur," ujar Garbus."Hidup di kuta itu sakit nyamannya kada katahuan urang karna ujar urang jakarte: gue.......gue dan lu......lu," sahut Palui pina babahasa indonesia.
"Hidup dikuta itu pasti nyaman, buktinya..... si Palui ini awaknya lamak wan putih-putihnya kada kaya kita di banua nang saban hari bapanas bahujan di pahumaan," ujar Tuhirang manyahut."Kukira bujur jua ujar Tuhirang itu sahut Garbus karna kudangar urang di kuta bisa lamak kama banyak nang manyuapi. Lalu kulitnya putih karna banyak nang manjilat, maklum jadi pajabat," ujar Garbus manyindir Palui.
"Alhamdulillah, bubuhan ikam mamuji aku, dipadahakan hidup nyaman hidup makmur karna jadi pajabat, ada nang manyuapi dan ada nang manjilat. Samunyaan ucapan bubuhan ikam itu bujur haja bahwa pajabat banyak bawahan nang manjilat dan banyak jua kakawalan bisnis nang manyuap alias manyogok" ujar Palui.
"Tamasuk ikam kalu Lui, kama awak ikam lamak wan putih-putihnya," ujar Garbus."Ampun maaf kakawalan sabarataan, bubuhan ikam salah tangguh, karna aku bulik ka banua ini adalah kana PHK kadada gawian lagi," ujar Palui."Sabujurnya gawian ikam napa?" ujar Tuhirang.
"Gawianku kada lain jadi wakar alias jaga malam di pabrik kayu, makanya awakku putih kamna siang guring saharian kada kana matahari dan dipadahakan balamak mungkin karna bantat kana panyakit biri-biri," ujar Palui mangaku tarus tarang.
"Ooo..... pantas haja wayah ku-urut tadi daging Palui pina balibak kaya kastila buruk," ujar Tuhirang mangalakak tatawa.
0 Response to "Si Palui "Putih Lamak""
Post a Comment