Si Palui "Tanginum Banyu Nyiur"
Kamarian itu Palui tulak saurangan ka pasar wadai, mancari macam-macam kahandak bininya nang harus ditulusakan.
Karna kababanyakan itulah inya sampai kada ingat lagi napa haja nang dipasani bininya.
Wayah buliknya inya tatamu Garbus wan Tulamak.
"Kita harus basyukur banar Bus ai, tahun ini kawa pulang bapuasa Ramadhan," ujar Palui.
"Bujur Lui ai, ada babarapa kawan kita nang tahun tadi rami-rami taimbai puasa dan tarawihan sakalinya tahun ini kada kawa umpat lagi kama sudah dikiyau ulih Tuhan," ujar Garbus.
"Umur manusia kadada nang tahunya kacuali Tuhan, makanya rajin-rajinlah baibadat apalagi bulan suci ini," ujar Palui.
"Aku sadih jua malihat kakawalan kita nang lainnya pina kada maingat wan ahirat.
Dianggapnya hidup ini kawa salawasan, padahal wayahini panyakit kada bapandang urang, kada bapandang pangkat atawa jabatan.
Wayah baisukan pina sihat haja, sakalinya tangah hari ji'un, kaya itu jua wayah kamarian masih pina lihum lihum haja sakalinya malamnya gim," ujar Garbus.
"Makanya manfaatkanlah sisa umur nang masih ada, wayah awak lagi sigar, masih kawa baibadat dan baamal," ujar Palui.
"Sudahkah manukar pabukaan?" ujar Tulamak batakun.
"Ini nah bungkusannya, aku sudah ka pasar wadai lalu handak bulik karna satumat lagi sajam dua jam dauh babunyi," ujar Palui mangincang bulik.Pabukaan napa nang ditukar abahnya?" ujar bininya manakuni Palui wayah sampai di rumah.
"Ini nah bungkusannya, lihati di dalamnya ada bingka, ada wadai amparan tatak wan ada puracit kasayangan ikam," ujar Palui manjulung bungkusannya.
"Nang basah wan dingin ini napa abahnya," ujar bini Palui.
"Ooooo....... itu es nyiur, tulung buatakan ka dalam mangkuk," ujar Palui manyuruh.
"Kanapa sampiyan kada manukarakan es nangka walanda pasanan ulun, sampiyan tahu haja bahwa ulun mangidam handak nang masam masam," ujar bini Palui sarik maraju.
"Astaghfirullah, aku kada kaingatan dingai, ayu ja isuk kaina kutukarakan karna bulan puasa masih panjang," ujar Palui mambujuki bininya.
"Kahandak nang di dalam parut ini kada kawa ditawar tawar," ujar bininya.
"Hari ini kita manginum es nyiur, isuk es nangka walanda, isuknya lagi es cendol," ujar Palui.
"Kada kawa isuk tapi hari ini jua, hari ini juaaaa...," ujar bininya manangsa. Ka pasar wadai jauh, satangah jam lagi bukaan," ujar Palui malamahi bininya.
"Kada kawa isuk, hari ini jua, wayah ini jua," ujar bininya makin sarik sambil bakacak pinggang lalu manunjul Palui sampai rabah muhanya takamija, malah tamasuk ka mangkuk es nyiur.
"Karorok... karorok, karorookkk.... Alhamdulillah, aku kada jadi lamas di banyu es nyiur, banyu esnya karing saurangan," ujar Palui mariga kakanyangan sambil maangkat muhanya matan mangkok es nyiur.
"Nahhhh, sampiyan batal tanginum banyu es," ujar bininya.
"Kada mungkin batal karna kada singhaja takinum wan ini tamasuk musibah," ujar Palui kada handak manyalahakan bininya.
0 Response to "Si Palui "Tanginum Banyu Nyiur""
Post a Comment