Si Palui "Wadai Putih Mangkining"
Samingguan ini Garbus wan Tulamak tiap kamarian haur bajajalanan ka pasar wadai.
Kadada pang nang ditukar, cuma balalihat haja sambil mahahaur puasa mangadapakan hari sampai babunyi dauh maghrib.di pasar wadai Garbus wan Tulamak batamuan wan si Palui nang bajalanan pina manyaurangan haja.
"Ui Lui, ujar Garbus mangajuti Palui. Napa nang handak ditukar maka pina wani manyaurangan," haja ujarnya.
"Bingka nang nyaman di hujung sana, wadai amparan tatak wan iwak paisan disubalah kanan," ujarTulamak manuduhi Palui.
"Aku paham haja Mak ai, suda kuitihi samunyaan," sahut Plaui.
"Lalu kanapa maka ikam pina papalingau tarus kaya ada nang dihaluki haja?" ujar Garbus."Aku mancari wadai nang......nang........"ujar Palui."Wadai nang, nangapa?" ujar Garbus.
"Ayu sambat kaina kubantu macariakan andaknya, karna aku sudah hapal siapa nang bajual wan napa haja jualannya." Wadai nang...... nang putih mangkining," ujar Palui lihum.
"Asa kadada dan balum biasa aku mandangar ada wadai nang bangaran wadai putih mangkining," ujar Garbus bingung.Ada ai," sahut Tulamak. "Wadai nang putih mangkining yaitu wadai "untuk-untuk bakukus".
"Dimana ikam biasa malihat?" ujar Garbus batakun."Babarapa hari ini aku manukari wadainya," ujar Palui.
"Kaya apa rupa urang nang bajualnya," ujar Garbus."Urangnya mayakinakan banar, putih kuning lamak mungkal batahi lalat disasala- nya," ujar Palui.
"Ooooo.... itu musti si Aniah nang bajual wadai amparan tatak wan wadai balapis," ujar Garbus mulai curiga.
"Aku sudah tahu ikam musti kada tatarik wan wadainya tapi tatarik wan urangnya nang babaju kabaya putungan kutabaru babalah di dada," ujar Garbus paham kalakuan kawannya.
Ooooo.... Pantas haja saban kamarian pasti tatamu wan Palui manyaraungan ka pasar wadai," hanyar paham.
"Nah........pas banar tangguhan ikam Bus ai, iya kalu wadainya putih mangkining," ujar Palui managuk liur. "Palui..Palui... Baingat puasa Lui, apalagi sudah batangah lusin buntut masih haja baliur wan janda kambang, mangkining."
ujar bubuhannya manawaakan kalakuan Palui.
0 Response to "Si Palui "Wadai Putih Mangkining""
Post a Comment