Si Palui "Kapanasan"

Palui akhirnya kawa jua baisi sapeda motor. Karna masih hanyar, Palui saban kamarian bakuliling  kota. Saban ikungan anaknya digoncengkannya. Tinggal bininya lagi balum biasa dibawanya bakuliling kota.“Aku pang abahnya, kada dibawa bakulilingkah. Kada anak buah haja pang nang handak babuat di buritan,” ujar bininya.

“Kalau ikam handak jua, ayu ai. Tapi jangan kakalubut batatapihan!” ujar si Palui.“Baapa lagi?” ujar bininya sarik.“Kaya urang wayah ini, basalawar umanya ai!” ujar Palui.Limbah itu, tulakai Palui lawan bininya bagoncengan kuliling kota. Kaya urang jua. Duduk kada bahereng lagi, tapi babirangkang kaya kakanakan atau gagadisan wayah ini. Maka rapat ja pulang baragap lawan si Palui.Pamulaan himungai dibawa bakuliling tu tadi. Asal tadapat lawan urang nang pina dikanal, bininya Palui musti bakuciak. Limbah urang malihat, lalu sabak lambaian.

Baca juga: Si Palui "Batal Samunyaan"

Tapi limbah sampai sapuluh menit mulai-ai galisah bininya si Palui. Setir balalu pina linggar.Ayu pang umanya, jangan pati bagagah pang!” ujar si Palui.“Aku kapanasan abahnya ai!” ujar bininya.“Kapanasan cara nangapa pulang, maka hari kananaungan kaya ini!”Bininya badiam satumat. Limbah itu pina galisah pulang.

“Ayu pang abahnya, kita bamandak pang dahulu, aku kapanasan!”“Umailah, macam apa jua ikam ni! Karena dahulu! Pamandangan lagi rami.”“Bujuran abahnya-ai, aku kada tahan lagi! panas banar!”Si Palui pupura kada mandangar.“Ayo, bamandak kada, kugiritiki nah!”Takutan diguritiki, tapaksa jua si Palui bamandak. Si Palui marangut. Tapi bininya manampaiakan talapak batisnya nang kanan.

Baca juga: Si Palui "Tanginum Banyu Nyiur"

“Nih, lihati! Talapak batisku mangalupung kapanasan! Kadanya panas matahari pang.”Dasar banaran. Bininya si Palui kada sing sandalan. Maka kada bajajak di kajajakannya pulang tapi di kanalpot. Napa ada, sama ai lawan dipanggang. 

Tweet