Si Palui "Harus Bapangalaman"

 Si Palui "Harus Bapangalaman"

Imbah habis upacara paringatan 17 Agustus samalam, Palui wan kakawalan badudukan sambil bakipas di palataran kalurahan karna lapah badiri wan kapanasan. Kada karasaan sudah tujuh puluh ampat tahun nagara kita ini mardeka, sudah banyak jua kamajuan nang sudah kita capai,” ujar Tulamak mamulai pander.

“Tapi ada jua kakurangannya Mak ai, yaitu sasar tahun hidup kita ini sasar bangalih. Rakyat kita banyak nang kalaparan, nang kasusahan, akhirnya maambil jalan pintas banyak nang jadi mangil wan rampuk. Padahal harusnya samakin tuha nagara kita ini, samakin nyaman jua rakyatnya,” ujar Garbus manyahut. Ikam tahulah Bus, napa sababnya maka wayahini banyak maling, jambret, begal wan rampuk,” ujar Palui manakuni Garbus.

Bacai jua: Si Palui "Bagunting"

Karna bubuhannya itu handak makan, kada baduit lalu mancuntan, mambajak atawa marampuk,” sahut Garbus. Bujur haja alasan ikam itu Bus ai tapi balum pas. Kalu alasannya cuma duit, kanapa maka urang baduit, urang bapangkat bisa jua mancuntan atawa marampuk,” ujar Palui. Kalu bubuhan jambret atawa maling mancuntan karna kada baduit. Paling puluhan hingga ratusan ribu rupiah nang dicuntan. Tapi bubuhan maling nang baduit kada cuma ratusan ribu nang dicuntannya, tapi ratusan juta sampai miliaran rupiah,” ujar Palui.

Hahahaaaa... aku paham, nang ikam maksud itu pasti maling atawa rampuk nang badasi, bamutur alias koruptor alias KKN pambantas duit rakyat,” ujar Garbus. Manurut pandapatku lain lagi alasannya kanapa maka ada cupit, jambret atawa maling itu kada cuma alasan handak makan tapi panyababnya labih mandasar lagi,” ujar Tulamak nang hanyar datang umpat manyurung jawaban.

Bacai jua: Si Palui "Tasalah Tangguh"

Umai, umai Mak haratnya panderan ikam itu pina bateori nang mandasar kaya panderan guru haja,” ujar Garbus. Napa alasan nang mandasar itu Mak?” ujar Palui. Alasan nang mandasar itu adalah karna wayahini ngalih mancari gawian, karna kada bacari lalu kada baduit, karna kada baduit lalu mancupit atawa mancuntan,” ujar Tulamak.

Bujur haja alasan Tulamak itu, karna kadada gawian dan manganggur itulah maka wayahini banyak cupit, maling bahkan rampuk. Kabanyakan nang manganggur itu adalah bubuhan remaja wan pamuda kita nang hanyar tamat sakulah,” ujar Garbus. Kalu sampai kadada gawian atawa kadada luwungan bagawi itu sabujurnya nang salah adalah pamarintah atawa bubuhan parusahaan-perusahaan,” ujar Palui.

Hau, kanapa maka pamarintah wan parusahaan nang disalahakan Lui??” ujar Tulamak. Buktinya satiap ada luwungan bagawi baik di pamarintah apalagi di parusahaan pasti ada syaratnya nang kada kawa dituruti ulih bubuhan remaja wan pamuda kita,” ujar Palui. Napa syaratnya itu Lui?” ujar Garbus.

Satiap luwungan pasti ada syarat nang mambaratakan, yaitu sudah bapangalaman paling kada satahun atawa dua tahun. Biar kaya apa remaja dan pamuda kita nang hanyar tamat sakulah atawa hanyar lulus kuliah kada baisian pangalaman bagawi. Maka itulah banyak pangangguran,” ujar Palui.

Bacai jua: Si Palui "Kada Basalawar" 

Naahhh... itulah alasan mandasar nang handak kusambat tadi, tapi tadahulu Palui,” ujar Tulamak ba-agak. 

Tweet