Si Palui "Kada Basalawar"

Baisukan itu kanapakah parut Palui pina tapulilit banar, mungkin samalam inya kabanyakan mauntal sambal acan katujuannya. Apalagi bila nang dipalit itu pucuk gumbili wan iwak karing sapat, pasti inya kada ingat napa-napa lagi, bisa talu kali tambah.

Karna parutnya sakit banar, hancap Palui tulak ka sungai. Tumatan jauh talihat Acil irus handak masuk ka jamban manggantikan Julak Ambrun.Uuuiiii... cil, kawa kah ulun badahulu?” ujar Palui kukuciak matan jauh.

Acil Irus rupanya pupura kada mandangar, padahal sidin tahu haja bahwa itu si Palui mangiyau, sidin tatap haja masuk jamban.“Nyaman banar! Aku matan tadi manunggui julak Ambrun!” ujar Acil Irus kada mau mangalah.“Lakasi cil lah, parut ulun rasanya maulak!” ujar Palui bakuciak di muhara lawang.“Bah, jangan di situ-nah. Aku kada kawa mahajan mun ikam di muhara lawang!” ujar acil irus matan dalam.

Baca juga: Si Palui "Talalu Pamalar"

“Balum lagi aku mahajan, sudah disuruh kaluar,” ujar Acil Irus gagarunum.Lawas Palui mahadangi, ada pang sapuluh manit tapi acil Irus baluman kaluar jua. Rupanya karna kalalawasan inya tapaksa bakuciak maancam acil Irus.“Lakasi cil! Mun kada ulun dubrak nah.”

Mandangar ancaman Palui, akhirnya Acil irus kaluar jua. “Dasar jua ikam ini, baluman habis tapaksa aku kaluar,”Acil Irus bamamai lalu babulik ka warung.Tarima kasih cil-lah?” ujar Palui bahancap masuk langsung badungkung.Diwarung rupanya sudah ada Garbus, Tulamak wan pambakal Anjam nang manunggui acil irus handak manginum kupi.

“Maaplah, kalo bubuhan ikam lawas manunggui,” ujar acil Irus. “Itu nah gara-gara si Palui kalalawasan bahira,” ujar acil Irus manyalahakan Palui. Kada lawas datang Palui ka warung Acil Irus sambil takurihing.“Kanapa kurihing-kurihing, Lui!” ujar acil Irus handak tahu.

Baca juga: Si Palui "Fitnah"

“Hari ini ulun tahu warna salawar dalam pian,” sambat Palui pina musti.“Warnanya apa, Lui?” ujar bubuhannya handak tahu.“Sidin, hari ini mamakai salawar kalir habang!” jawab Palui banyaring.“Wah, ikam tadi di muhara lawang jamban, mahintip aku kah?” ujar acil Irus manyarik.

“Kada, cil-ai!” ujar palui.“Bah, kanapa ikam maka tahu?” ujar acil irus panasaran.Hancap Palui mangaluarakan salawar dalam nang babungkus kantong palastik matan kantong salawarnya...“Ini nah, salawar pian tadi katinggalan di jamban, wayah pian bahancap-hancap tadi,”

Bubuhannya nang badudukan di warung acil Irus katawaan.“Jadi, wayah ini ikam kada basalawar kah?” ujar pambakal Anjam umpat takarinyum. Mandangar tatakunan pambakal, hinip acil Irus kada sing bunyian kaya siput dipais.

Baca juga: Si Palui "Untung Ada Dauh"

Tweet