Si Palui "Talalu Pamalar"

Di kampung Palui tiap malam Jumahat dilaksanakan urunan yasinan. Rami tiga puluhan warga bakumpulan di masjid mambaca surah yasin, waqiah, tabarak wan batahlil. Limbah itu mandangarakan tausiah guru H Iriansyah nang rajin jadi imam di langgar itu jua.

”Bagus banar Bus ai, kita kawa manyampatakan waktu mahadiri pangajian di majlis taklim ini tiap malam Jumahat,” jar Palui ka Garbus.Mun alasan haur kadada habisnya, ada tarus kasibukan, apalagi bawarung makan, ngalih maninggalakan usaha,” sahut Garbus. Guru H Iriansyah dalam tausiahnya manyatakan kita hidup ini sadang-sadang haja bausaha, jangan kada tahu burit kapala.”Kita ini hidup kada lawas, bila waktu zuhur tutup tuku, lakasi datangi masjid,” ujar guru.

Baca Juga: Si Palui "Berjanji Mambina" 

Limbah tuntung batausiah, rami urang basusurung nasi bungkus nang disadiakan ulih nang kana gilir manjamu makanan wan minuman. Selain itu beredar celengan gasan masjid satu persatu ke anggota urunan yasinan.”Oi Mak, jangan dicelengi hajalah, celengan tapi dibuati duit,” ujar Palui ka Tulamak.

Dihiga Palui sakalinya kakarasak Pakacil H Bungas mancaluk ka kantung salawar. Taungkai duit kartas habang-habang warnanya, nang hijau, nang ungu ada jua. Sidin mancari banar ka duit mamilih dan memilah, sakalinya sabuting ribuan haja nang dibuat ka celengan.

”Sudah aku umpat jua mambuat sadikit buhannya ai,” jar pakacil nang terkenal pamalar banar.Tuntung mambuat ka celengan , Pakacil H Bungas digamit ulih Palui sambil manating duit dua ratus ribu.”Ini Lui, buat nah duitnya ka celengan,” sahut pakacil.Digamit pulang ulih  Palui pakacil ini.”Sini nah, aku mambuatakan ka celengan. Banyaknya Lui ikam basedekah?”takun sidin, tapi  Palui manggut-manggut haja pang.

Baca Juga : Si Palui "Putih Lamak"

Bulikan matan masjid, sampai di rumah, pakacil galu banar, kahilangan duit dua ratus.”Lui aku kahilangan duit dua ratus ribu nah?” sidin pucat muha bahabar ka  Palui.“Itu tadi duit pian, Pakacil ai. Tagugur dari kantung pian pas mancaluk,dua ratus ribu, makanya ulun dua kali manggamit, jar pian buat haja ka celengan, wan pian jua nang mambuatnya?” ucap  Palui tatawa banar.

“Astaga itu tadi duitku kah?” jawab sidin sambil bagaru kapala.“Pian itu talalu pamalar, alias engken, ngalih banar mancari duit ribuan sakalinya guguran duit dua ratus ribu kada tahu,Pian. Iya kalu pakacil…,” sahut Garbus manumpalak.

“Ayu ja nang akan datang aku bahati-hati, kada taulang lagi banyak banar jadinya aku mambuati duit ka celengan…,” ucap sidin pina pucat muha kamanyasalan.Han jarku kaya apa ya. Manyasal banar banyak besedekah, padahal sudah tulak haji, apalagi kada basyukur haja pakacil nih,” singgung Tulamak, lihum baarit  Palui wan Garbus malihat pakacil pina pusang.

Baca Juga: Si Palui "Wadai Putih Mangkining"

Tweet