Si Palui "Tuntung Piala Dunia"

Malihat urang pina rami manonton sepakbola di tipi,taungut si palui kaingatan waktu piala dunia lagi rami-raminya Messi dan Ronaldo sama-sama handak marasai juara maraga kada parnah manang pildun sama sakali.Waktu itu di rumah palui baisi tipi sabutingannya haja,halus pulang.

Biasanya Palui taparabut lawan anak bininya amun handak manonton tipi,apa seleranya balain-lain.Nang anak katuju nonton kemos,imbah ngintu bininya katuju lawan sinetron.

Amun Palui katuju manonton ulahraga,jadi pasti tapahual.Tapikir jua palui handak manambah tipi lagi,biar inya kawa manonton kada taganggu lawan anak bininya. Kabalujuran inya pas dapat arisan.Dihitung-hitung jumlahnya kawa gasan manukar tipi nang taganal pada nang ada. 

"Kaya apa kalu duit arisan ini aku tukarakan tipi 21 inci, biar aku kawa nonton saurangan kada taparabut lawan bubuhan ikam?" ujar Palui lawan bininnya yang pina asyik banar manonton sinetron.

Bacai jua: Si Palui "Harus Bapangalaman"

"Amun kadada kaparluan nang lain, ayu ja tukarakan tipi, nyaman pian kawa manonton sepakbola saurangan. Ulun jua kada taganggu," sahut bini Palui nang matanya kada sing lapasan matan tipi.Rupanya sinetron lagi tegang-tegangnya. "Amun kaya itu aku tulak ka pasar dahulu mancari barangnya," ujar Palui sambil mamuruk baju.

Sabulan acara piala dunia, sabulanan Palui kada sing absenan di muka tipi. Kada tahu siang, kada tahu malam, amun ada siaran langsung kada suah tatinggal.

Ujar urang sampai khatam. Tuhuk sabulanan barandam di rumah, handak jua Palui bajajalan kaluar rumah maubah rasa. Kamariannya Palui saparanakan bakuliling kota lewat di muka gubernuran singgahan makan. Kada tarasa hari parak magrib, baancap Palui mambawai anak wan bininya bulikan, apa parasaanya pina kada nyaman.

Bacai jua: Si Palui "Bagunting"

Sampai di rumah hari pina kadap, lampu balum balikit. Pas handak mambuka kunci ka lubang, sakalinya lawang- nya sudah tabuka. Takajut ai Palui.Ditiringinya nang bini sambil batakun. "Ikam kada ingat mangunci lawangkah tadi waktu tulak?" ujar Palui sambil manjinguk ka dalam rumah. "Sudah, sampai tiga kali mamutar kuncinya, itu gin pas handak tulak ulun pariksa pulang," ujar bini Palui umpat jua manjijinguk. "Wah labar am, bisa ada nang masuk tadahulu pada kita! Ikam lawan Utuh hadangi di luar biar aku pariksa dulu!" ujar Palui mamadahi bininya.

Dipariksainya barang-barang nang ada di rumah.Kulkas pina ada haja bacucuk, kipas angin bacungkungan di higa lawang. Tapi waktu inya masuk ka kamar guring, pina lingai meja tipi di hadapan ranjang. Langsung ai kaluar Palui mandatangi bininya. "Samunyaan ada haja kacuali tipi kita nang hanyar," ujar Palui.Takajut ai bini si Palui sambil maitihi bakas andakan tipi. "Wah dasar hibat malingnya, tahu wan niat pian handak manukar tipi sabulan nang lalu." "Niat nang mana umanya?" bingung si Palui mandangar ucapan bininya.

Bacai jua: Si Palui "Kada Basalawar"

"Ingatlah pian waktu handak manukar tipi nang itu, pian baniat gasan nonton piala dunia sabulanan haja kalu? Jadi malingnya manuntungakan piala dunia dahulu, hanyar dicuntannya tipi kita," ujar bininya. 

Tweet