Si Palui "Badamai Duduk Sa Mija"

Wayah pandataan panduduk miskin nangcagar manarima duit kunpensasi BBM samalam, Palui wan Tuhabuk sawat bahualan. Tuhabuk sarik ngarannya dicurit, kada dimasukakan karna dianggap mampu haja ulih Palui nang katua RT. Untung haja waktu itu ada Pambakal nang umpat mahalat.

“Kanapa Lui samalam ikam pina bakalahian lawan Tuhabuk,” ujar Garbus manakuni Palui. Aku kada bakalahi Bus ai, cuma bahualan haja,” ujar Palui. Kalu bahualan itu wan muntung tapi ikam samalam itu bahualan wan tangan,” ujar Garbus.

Bacai jua: Kumpulan kusah Si Palui

“Aku tapaksa wan tangan itu, karna inya kada paham panderanku,” ujar Palui.Tapi kanapa maka dahinya bincul,” ujar Garbus.Dahinya bincul itu karna tahangkup halu lasung,” balas Palui.Halunya ba-andak di mana maka sampai tahangkup ka dahinya,” ujar Garbus. Kabalujuran halu lasung itu ada di tanganku,” ujar Palui.

“Sabujurnya aku kada singhaja tapi karna disabari dan halu itu dirabuti ulih pambakal maka tapukulakan ka Tuhabuk itu. Untung haja...,” ujar Palui kada manarusakan.“Hau kanapa maka untung, padahal ikam jelas-jelas mamukukalannya,” ujar Tulamak umpat bapander. Untung ... untung haja kana Tuhabuk, andaikata kana pambakal pasti cagar barat hukumannya,” ujar Palui.

Bacai jua: Si Palui "Tuntung Piala Dunia"

“Bubuhan ikam ini bahual dan bakalahi papadaan, makanya badamai haja, kita duduk sa-mija ungkai napa masalahnya,” ujar pambakal manyuruh Garbus wan Tulamak manyiapakan wadah pardamaiannya. partamuannya. Palui pamulaan datang langsung masuk ruangan, dilihatnya balum ada urang, kamudian manyusul si Tuhabuk lawannya bakalahi. Kaduanya sambil basalaman.

“Aku balum biasa mangalami kaya apa caranya badamai duduk sa-mija itu,” ujar Palui bakisah wan Tuhabuk. “Kaya itu jua aku balum biasa badamai duduk sa-mija,” ujar Tuhabuk manyahut.

Bacai jua: Si Palui "Bagunting"

“Kalu kaya itu, sambil mahadang pambakal, Garbus wan Tulamak kita dudukan haja di mija,” ujar Palui mambawai. Tulamak naik jua ka mija lalu dudukan sambil bapapanderan. Kada lawas datang pambakal, lalu langsung mangiyau Garbus. Bus ... ui Bus, mana kursinya balum ikam susun,” ujar pambakal.

“Kada parlu bakukursian pambakal ai, ujar sampiyan jua samalam bahwa pardamaian ini kita duduk sa-mija. Itu nah ... Palui wan Tuhabuk nang handak didamaiakan sudah mancungkung duduk di mija,” ujar  Garbus manunjuk.

“Bah, dasar Garbus wan Tulamak ini kada pintar kanapa maka dibiarakan bubuhannya duduk di mija,” ujar pambakal pina sarik.Kalu kami kada pintar wajar haja karna kami kada sakulah, tapi ada lagi nang kada pintar dan kada waras,” ujar Garbus.“Siapa nang kada pintar dan kada waras itu Bus?” ujar pambakal.

“Ituuu ... itu nang duduk mancungkung di atas mija itu nah nang kada pintar dan kada waras,” ujar Garbus manunjuk Palui wan Tuhabuk nang bakalahi.

Tweet